Potraga za ubicom Alijom Balijagićem još traje, a proširila se na nekoliko država.
“Telegraf” je razgovarao s jednim od mještanina Brajkovca koji je imao bliski susret s Balijagićem.
– Imao sam mnogo sreće, da je htio, mogao je da me ubije – rekao je Zoran R. (ime promijenjeno zbog zaštite sagovornika) za Telegraf.
On je jedan od rijetkih koji su u Srbiji imali blizak susret s Alijom Balijagićem.
– U petak sam krenuo da prošetam. Na oko 100 metara od kuće, tamo gdje mi je štala, je iskočio. Nosio je pušku na ramenu, bio je dobro obučen, imao je toplu jaknu i neke debele pantalone i nove čizme. Na leđima je nosio pun ranac. Bio je ćelav, imao je oko centimetar brade i nije nosio nikakvu kapu. Prije toga sam ga čuo, krio se jedno 50 metara. Viknuo sam: “Ko je?!”, a on je tad izašao, rekao da se ne bojim i da je lovac – priča mještanin za Telegraf.rs.
Kako kaže, Balijagića je prepoznao, razmišljao je i da li da pokuša da mu otme pušku, ali mu je vidio futrolu na pojasu, municija mu je bila pri ruci, a nije bio siguran da li ubica ima nož.
– Ponudio me je rakijom, ja sam popio jednu, jabukovača je bila, lijepa rakija. Kad je rekao da je lovac, rekao sam da je lov taj dan zabranjen i pitao sam gdje mu je pas. Rekao je da je pas otišao za divljači u šumu. Pitao me je jesu našli tog čovjeka što ga traži policija, kada sam rekao da nisu još, rekao je: “Naći će oni njega, ne brini” – dodaje.
Potom su se rastali. Mještanin je krenuo nazad ka kući, a Balijagić mu je, kako tvrdi, rekao da ide prema Ivezićima.
– Ja sam čuo da je on u Ivezićima bio prije nego što je došao ovdje, pa sam se okrenuo da vidim na koju stranu ide, ali i on je stao, okrenuo se, i pogledao u mene. Nisam htio da se igram životom, da pokušam da ga pratim – priča.
Nakon toga, njegov brat je odmah javio policiji šta se dogodilo. Ubrzo potom veliki broj policajaca došao je u Brajkovac.
– Ovdje ima nekoliko raštrkanih kuća, svi smo na po 500 metara razdaljine. Žandarmerija je pretresla teren, gore u šumi iznad kuće, kod komšinice koja živi sama, pretraživali su pripadnici SAJ. Letjeli su i dronovi. Nisu ga pronašli – dodao je.
Kako kaže, “samo se lud čovjek ne plaši”, mještani su u strahu, svjesni da Balijagić tokom noći može da se vrati. Siguran je da on ulazi noću u kuće jer su noći hladne, a mnogo je napuštenih kuća u okolini. On sam nije prespavao četiri noći u svojoj kući. Mnogi su otišli kod rođaka, a čuo je i da je grad Prijepolje pozvalo ljude koji žive u izolovanim selima u planini da siđu u grad i da će im biti osiguran smještaj.
